ცარიელი აეროპორტი

რეისების გაუქმება კორონავირუსის გამო: როგორ დავიბრუნოთ ბილეთებში გადახდილი თანხა

დროა ვისაუბროთ. ყოველდღე ვიღებთ უამრავ შეკითხვას კორონავირუსის გამო შექმნილ ვითარებასთან დაკავშირებით. ყველაზე გავრცელებულ კითხვებს შორისაა: „როგორ დავიბრუნოთ იმ რეისების ბილეთებში გადახდილი თანხა, რომლებიც კორონავირუსის გამო გაუქმდა“? მოდით, გავერკვეთ.

როდის შეგვიძლია სრული ანაზღაურების იმედი ვიქონიოთ?

თქვენ შეგიძლიათ ბილეთების ღირებულების სრულ ანაზღაურებაზე იქონიოთ პრეტენზია, თუ თქვენი რეისი ავიაკომპანიამ გააუქმა.

თუ ავიაგადამზიდავმა რეისი არ გააუქმა, ქვეყნის საზღვრები ჯერ კიდევ არ არის ჩაკეტილი და მოგზაურობაზე უარს თქვენი სურვილით ამბობთ, მაშინ ბილეთის დაბრუნება ან ფრენის თარიღის შეცვლა შეგიძლიათ მხოლოდ იმ ტარიფის წესების მიხედვით, რომლითაც ბილეთი შეიძინეთ. ანუ, სავარაუდოდ, არასრულ თანხას დაგიბრუნებენ.

შეიძლება ითქვას, რომ კორონავირუსთან დაკავშირებული მთელი ეს ისტორია ფორს-მაჟორია და სრული თანხის დაბრუნება მოვითხოვოთ? არა.

საერთაშორისო იურიდიული ფირმა Kinstellar-ის საავიაციო სექტორის უფროსი, ადვოკატი ალექსეი ბურჩევსკი ამბობს, რომ ამ შემთხვევაში ფორს-მაჟორზე აპელირება არ გამოვა, რადგან მგზავრს თეორიულად შეუძლია გააგრძელოს მოგზაურობა, თუნდაც მოგზაურობა აღარ აკმაყოფილებდეს მის მიზნებს (მაგალითად, კონფერენცია, რომელზეც მოხვედრა სურდა, გაუქმდა).

ფოტოს ავტორი – dell640

თუ რეისი მაინც გაუქმდა, შეგვიძლია დამატებითი კომპენსაციის მიღების იმედი ვიქონიოთ? და არა მხოლოდ სრული ანაზღაურების?

თუ ფრენების გაუქმება ავიაკომპანიის ინიციატივით მოხდა, მგზავრებს, რომლებსაც ორ კვირით ადრე არ მიუღიათ შეტყობინება რეისის გაუქმების შესახებ, უფლება აქვთ მიიღონ კომპენსაცია 250/400/600 ევროს ოდენობით, ფრენის ხანგრძლივობიდან გამომდინარე.

მაგრამ! თუ ავიაკომპანია რეისს აუქმებს ხელისუფლების გადაწყვეტილების გამო (მაგალითად, საზღვრების ჩაკეტვის გამო), მაშინ მგზავრებს დამატებით კომპენსაციას არ გადაუხდიან, საგანგებო გარემოებებზე მითითებით, თუმცა ბილეთის ღირებულება მაინც უნდა დააბრუნონ.

კიდევ რა უნდა ვიცოდეთ?

თუ ორივე გზის ფრენა ერთი ჯავშნის ფარგლებშია გაფორმებული და ერთი რეისი გაუქმდა, თქვენ გაქვთ უფლება ბილეთი დააბრუნოთ ან მთელი მოგზაურობა გადაჯავშნოთ.

თუ თითოეული რეისი ცალკეული ჯავშნით არის გაფორმებული, მაშინ გაუქმებულ რეისთან დაკავშირებული ყველა მოქმედება ტარიფის წესების შესაბამისად ხორციელდება.

უშუალოდ რა უნდა გააკეთოთ, რომ ბილეთის სრული ღირებულება დაიბრუნოთ?

  • როგორც უკვე ვთქვით, ჯერ უნდა დაელოდოთ რეისის გაუქმების შესახებ ოფიციალურ დადასტურებას ავიაკომპანიის ვებგვერდზე ან ამ ავიაკომპანიისგან თუ გამყიდველისგან გამოგზავნილ SMS/ელ.ფოსტას. ოფიციალურ განცხადებამდე, ბილეთი ნებაყოფლობით დაბრუნებულად ჩაითვლება, შესაბამისად ანაზღაურების თანხა გამოითვლება შეძენილი ტარიფის მიხედვით.
  • შეამოწმეთ არის თუ არა რაიმე ცალკე მითითება თქვენი რეისის შესახებ.
  • თუ ავიაკომპანია დაბრუნებას ადასტურებს, მიმართეთ გამყიდველს. სად უნდა ვეძებოთ იგი? თქვენს ბილეთში არის კონტაქტები. გამყიდველი შეიძლება იყოს როგორც ავიაკომპანია, ისე ონლაინ სააგენტო.
  • ბილეთების გამყიდველის ვებგვერდზე შეამოწმეთ შესაძლებელია თუ არა თქვენი პირადი კაბინეტის მეშვეობით ანაზღაურების შესახებ განაცხადის დატოვება. თუ ეს შესაძლებელია, შეეცადეთ თანხის დაბრუნება სწორედ ვებგვერდის მეშვეობით გააფორმოთ. გვერწმუნეთ, ეს უფრო სწრაფია, ვიდრე ტელეფონით ან ელ.ფოსტით.
  • თუ ასეთი შესაძლებლობა არ გაქვთ, დაუკავშირდით სააგენტოს ან ავიაკომპანიას, მიუთითეთ თქვენი მონაცემები. თქვენ აუცილებლად გაგიწევენ დახმარებას.

როგორ მოვიქცეთ, თუ არ არის რეაქცია/პასუხი? პირველ რიგში – ნუ იდარდებთ. მეორეც – კიდევ ერთხელ ნუ იდარდებთ. ორი-სამი დღე დაელოდეთ. ასეთი ავრალის პირობებში ეს ნორმალური ვადაა. თქვენ აუცილებლად გიპასუხებენ.

როგორ მოვიქცეთ, თუ რეისი არ გაუქმებულა?

თუ გაუქმების შესახებ ოფიციალური განცხადება არ გაკეთებულია, თვალყური ადევნეთ ინფორმაციის განახლებას. ჩვეულებრივ რეისის გაუქმების შესახებ შეტყობინებას ავიაკომპანიის ვებგვერდზე ან SMS/ელ.ფოსტით მეშვეობით ავრცელებენ.

ავიაკომპანიისგან არანაირი ინფორმაცია არ მიგვიღია, ხოლო სააგენტო-გამყიდველი უარს ამბობს ბილეთში გადახდილი თანხის დაბრუნებაზე

დიახ, ასეც ხდება ხოლმე. თუმცა, როგორც ამბობენ, no panic. თუ სააგენტო თავაზიანად ან არცთუ ისე (ახლა ყველა ნერვებზეა) უარს ამბობს სრულ ანაზღაურებაზე, ეს ნიშნავს, რომ მას ავიაკომპანიისგან ნებართვა ჯერ არ მიუღია. როგორც უნდა მოვიქცეთ? კიდევ ერთხელ რაღაც დროით „ჰაჩიკოდ“ იქცეთ. დაელოდეთ ოფიციალურ განცხადებას რეისის გაუქმების შესახებ ავიაკომპანიის ვებგვერდზე ან SMS/ელ.ფოსტას გამყიდველისგან. ამის შემდეგ კი დაუკავშირდით ბილეთების გამყიდველს. ამ შემთხვევაშიც უმჯობესია მოთხოვნა საიტზე დატოვოთ. თუ, რა თქმა უნდა, ასეთი შესაძლებლობა არსებობს, თუ არ არსებობს – დარეკეთ-მიწერეთ ფოსტაზე.

ავიაკომპანიის წესები

მოდით უფრო დეტალურად ვისაუბროთ იმის შესახებ, თუ როგორ აბრუნებენ ავიაკომპანიები კოროვირუსის გამო გაუქმებულ ბილეთებში გადახდილ თანხას და საერთოდ აბრუნებენ თუ არა.

Ryanair, Laudamotion, Buzz

რეისის გაუქმების შემთხვევაში, ეს ავიაკომპანიები გთავაზობთ უფასო ალტერნატივას ან ბილეთების ღირებულების სრულ ანაზღაურებას. ჩვენს კოლეგას Ryanair-მა თანხა უკვე დაუბრუნა. თუმცა ახლა ამ დაბალბიუჯეტურ კომპანიასთან დაკავშირება ნამდვილად ადვილი არ არის, მხარდაჭერის სამსახური ვერ უმკლავდება განაცხადების რაოდენობას, თანაც მათი ვებგვერდი ხშირად „ჭედავს“. მაგრამ არ ინერვიულოთ. ყველაფერს დაგიბრუნებენ, უბრალოდ არცთუ ისე სწრაფად. შეამოწმეთ თქვენი ფოსტა და პირადი კაბინეტი. ავიაგადამზიდავი აუცილებლად გამოგიგზავნით ბმულს დაბრუნების ინსტრუქციასთან ერთად.

Wizzair

ავიაკომპანია Wizzair სპეციალურ Wizz-ანგარიშზე კრედიტის სახით რიცხავს გაუქმებული ბილეთის ღირებულების 120%-ს. შემდეგ მისი გამოყენება შესაძლებელია ახალი ბილეთების შესაძენად. ასევე შესაძლებელია თანხის 100% დაბრუნება საბანკო ბარათზე. კრედიტი Wizzair-ის ანგარიშზე ავტომატურად დაირიცხება. თუ თანხა ბარათზე გჭირდებათ, მხარდაჭერის სამსახურს მიწერეთ.

თუ ფრენის გაუქმებისთვის თანხის სრულად დაბრუნება გსურთ, დაუკავშირდით კომპანიას 14.04 შემდეგ. ავიაგადამზიდავმა მოთხოვნების რეგისტრაციის ფორმა გამორთო მიმართვების დიდი ნაკადის გამო.

Skyup

მათ, ვინც ბილეთები 13 მარტიდან 30 აპრილის ჩათვლით პერიოდში შეიძინა, ხოლო გამგზავრების თარიღი 31 მაისამდეა, SkyUp-მა შესთავაზა ვარიანტი: დაუბრუნოს თანხა, თუ მგზავრი ბილეთს გამგზავრებამდე არაუგვიანეს 3 დღით ადრე გააუქმებს.

მათ, ვინც ბილეთები 13 მარტამდე შეიძინა და რომელთა საერთაშორისო რეისები საკარანტინო პერიოდს ემთხვევა (ამ დროისთვის 23 მაისამდე), გადამზიდველმა შესთავაზა ბილეთების ჯავშნის თარიღის გადაცვლა უფრო გვიან თარიღზე ან უარი თქვას ფრენაზე ტარიფის მიხედვით.

ანუ, თუ თქვენ გაქვთ ეკონომ-კლასის ბილეთი (ყველაზე იაფი ბილეთი), მაშინ თანხას არ მიიღებთ. სხვა ტარიფებისთვის შესაძლებელია დაბრუნება, მაგრამ ღირებულების 50%-იანი დანაკარგით.

UIA

UIA-ს გაუქმებული რეისების მგზავრებს შეუძლიათ ბილეთი ელექტრონულ ფულში გადაცვალონ. როგორ ხდება ეს? ავიაკომპანია გთავაზობთ სახელობით ვაუჩერს, რომლის ნომინალი შეადგენს გადახდილი ბილეთის ღირებულების ან მისი გამოუყენებელი ნაწილის 125%-ს. ვაუჩერის გააქტიურება აუცილებელია მისი გამოშვებიდან ერთი წლის განმავლობაში ავიაკომპანიის საკუთარ რეისებზე ახალი ბილეთების გასაფორმებლად.

ამჟამად UIA მიმოწერის რეჟიმში მუშაობს. წერილებს მაშინვე არ პასუხობენ, მაგრამ პასუხობენ.

Windrose

თანხის სრულ ანაზღაურებას ავიაგადამზიდავი უზრუნველყოფს მხოლოდ ფრენის გაუქმების შემთხვევაში და იმ რეისებისთვის, რომლებიც 17 მარტიდან 3 აპრილამდე სრულდებოდა.

AirBaltic

AirBaltic სთავაზობს ვაუჩერებს ბონუსით იმ გაუქმებული რეისებისთვის, რომლებიც 14 აპრილამდე უნდა შესრულებულიყო. ვაუჩერის ნომინალი მოიცავს ბილეთის სრულ ღირებულებას და დამატებით 20 ევროს ერთი გზის ფრენისთვის.

Qatar Airways

Qatar სთავაზობს შეძენილი ბილეთების ღირებულების ვაუჩერს, რომლის მოქმედების ვადა გამოშვებიდან 1 წელია. ავიაკომპანია თავის მომხმარებლებს ასევე სთავაზობს გამგზავრებამდე არა უგვიანეს 3 დღით ადრე შეცვალონ ფრენის თარიღი დამატებითი გადასახადის გარეშე.

Turkish Airlines

Turkish Airlines-ს თანხის დაბრუნების არჩევანი აქვს. ამასთან, ავიაკომპანია ბილეთის ვაუჩერში გაცვლასა (ბილეთის ღირებულების დამატებით 15%-ის მიღებით) და მგზავრობის თარიღის მოგვიანებით არჩევის შესაძლებლობას სთავაზობს. ვაუჩერი ერთი წლის განმავლობაში უნდა გამოიყენოთ. ბილეთის ღირებულების ყოველ 10 ევროში ასევე შეგიძლიათ გამოიმუშავოთ 1000 მილი. დეტალური ინფორმაცია პირობების შესახებ აქ შეგიძლიათ იხილოთ.

Pegasus Airlines

პეგასუსის ავიახაზები თანხას დააბრუნებს მხოლოდ ფრენების აღდგენის შემდეგ. მათი პირობაა ფრენების აღდგენის შემდეგ 2 თვის ვადაში დაგიბრუნონ თანხა ან გადაცვალოთ ავიაბილეთი უფასოდ, ასევე შესაძლებელია თქვენი ბილეთის ღია თარიღად გადაქცევა, და შემდგომ ჩასვათ სასურველი თარიღი როცა ფრენა აღდგება.

Air France და KLM

31 მაისამდე რეისებზე Air France და KLM სთავაზობს თანხის დაბრუნებას ვაუჩერების სახით მომდევნო მგზავრობისთვის ან 31 მაისამდე რეისების თარიღებისა თუ მიმართულებების უფასო შეცვლას.

თეგები: , , , ,

მოძებნე ავიაბილეთი

შენთვის სასურველი მიმართულებით საუკეთესო ფასად

Leave a Comment

მობილური აპლიკაცია

მოიძიეთ და დაჯავშნეთ იაფი ავიაბილეთები პირდაპირ თქვენი სმარტფონებიდან, მიიღეთ უფრო მეტი სიამოვნება თქვენი მომავალი დასვენებისთვის.

გადმოწერა