მოგზაურობა რომში: გამოცდილი მოგზაურების რჩევები

ახლო მომავალში რომში მოგზაურობას გეგმავთ? ეს სასარგებლო რჩევები სწორად დაგეგმვაში დაგეხმარებათ და  მარადიულ ქალაქში თქვენს მოგზაურობას დაუვიწყარს გახდის.

როგორ ვიმგზავროთ აეროპორტიდან რომის ცენტრში?

როგორ მოვხვდეთ  „ფიუმიჩინოს“ აეროპორტიდან რომის ცენტრში?

მატარებლით. Leonardo Express ყოველ 30 წუთში კურსირებს. რომის „ტერმინის“ სადგურამდე დაახლოებით ნახევარი საათის გზაა, მგზავრობის ღირებულება 14 ევროა. სადგური  აეროპორტის ტერიტორიაზე მდებარეობს (მინიშნები ორიენტირებაში დაგეხმარებათ). ექსპრესი მოძრაობს ყოველდღე 6:23 საათიდან 23:23 საათამდე.

ავტობუსით. ავტობუსები Terravision კურსირებს 5:35 საათიდან 23:00 საათამდე, გადის ყოველ 30 წუთში. გაჩერებას ადვილად იპოვით, იგი #3 ტერმინალთან მდებარეობს, პლატფორმა #14. ავტობუსი „ტერმინის“ სადგურში ჩადის. ბილეთის ღირებულება 7 ევროა. მგზავრობის ხანგრძლივობა დაახლოებით 55 წუთია.

ტაქსით. მგზავრობის ღირებულება დაახლოებით 40 ევროა.

შეგახსენებთ, ავიაბილეთებს რომის მიმართულებით თბილისიდან და ქუთაისიდან შეიძენთ აქ>>>
სად დავჯავშნოთ სასტუმრო რომში: 7 საუკეთესო რაიონი

როგორ მოვხვდეთ  „ჩამპინოს“ აეროპორტიდან რომში?

ავტობუსით. Terravision კომპანიის ავტობუსი თითოეული თვითმფრინავის ჩამოფრენის შემდეგ გადის. მგზავრებს აეროპორტის გასასვლელში ელოდებიან, ტრანსპორტი ჯერ რომის მეტროს ბოლო სადგურამდე ჩაგიყვანთ, შემდეგ კი „ტერმინის“ სადგურამდე. მგზავრობის ხანგრძლივობა დაახლოებით 40 წუთია. ბილეთის ღირებულება 7 ევროა.

 „ტერმინის“ სადგურამდე ასევე შეგიძლიათ იმგზავროთ  Autostradale ავტობუსით, რომელიც აეროპორტის შენობიდან ყოველ საათში 7:45 საათიდან 23:45 საათამდე კურსირებს. მგზავრობის ხანგრძლივობა დაახლოებით 45 წუთია. ბილეთის ღირებულება 7 ევროა.

ტაქსით. საბაზისო ტარიფი - €35.

რომის უბნები: სად გავჩერდეთ?

რომი დაყოფილია უამრავ ზონად, ოლქად, უბნად, კვარტლად, ჩვენ კი რამდენიმე მათგანზე გიამბობთ. თქვენი განწყობა და შთაბეჭდილება ქალაქის შესახებ დამოკიდებული იქნება იმ უბანზე, სადაც მოგზაურობის დროს განთავსდებით.

ჩელიო

იდეალური ვარიანტია. უბანი რომის კოლოსეუმთან მდებარეობს, მაგრამ მიუხედავად ამისა, აქ სიმშვიდე და სიწყნარეა. და რა სილამაზეა! ყავის დალევა ქალაქის მთავარი ღირსშესანიშნაობის ფონზე, რა თქმა უნდა, დიდი ბედნიერებაა.

პანთეონი

შესანიშნავი ადგილი ძველი ქალაქის ცენტრში. აქ შეგიძლიათ სრულად ჩაერთოთ რომის კულტურასა და ისტორიაში. ასევე ეს საუკეთესო ადგილმდებარეობაა, თუ ყველაზე საინტერესო და მნიშვნელოვანი ღირსშესანიშნაობების მოვლას ფეხით აპირებთ.

ტრასტევერე

აქ ძალიან სასიამოვნო ატმოსფერო სუფევს, სადაც უამრავი მომაჯადოებელი ძველი სახლი, რესტორანი ოჯახური პასტითა და გემრიელი ღვინოთი, მყუდრო მოედანი და ლამაზი ქუჩაა. მთავარ ღირსშესანიშნაობებამდე დაახლოებით ნახევარი საათის მანძილია, გზად კი საოცარი ქუჩებით ტკბობას შეძლებთ.

რომის გეტო

ოდესღაც ამ ადგილზე  ებრაელები ძალიან რთულ პირობებში ცხოვრობდნენ, ახლა კი აქ უამრავი მდიდრული ბუტიკი-სასტუმრო, სამხატვრო სალონი, ძვირადღირებული რესტორანი და საოჯახო ტრატორიაა ებრაული სამზარეულოთი. დღეს გეტო რომის ერთ-ერთი ყველაზე პრესტიჟული უბანია.

პრატი, ვატიკანი

აქედან კოლოსეუმამდე დაახლოებით 15 წუთის სავალია საზოგადოებრივი ტრანსპორტით, მაგრამ ვატიკანის მუზეუმები, წმინდა პეტრეს ტაძარი, წმიდა ანგელოზის ციხე და პიაცა ნავონაც კი ფეხით სავალ მანძილზეა.

რა ღირს სასტუმრო რომში?

რომში განთავსების ობიექტების ფასი დამოკიდებულია სასტუმროს ადგილმდებარეობაზე, მომსახურების პირობებსა და დონეზე. გთავაზობთ  საორიენტაციო ღირებულებას.

• 3 ვარსკვლავიანი სასტუმრო - ერთი დღე-ღამე 60 ევროდან.
• 4 ვარსკვლავიანი სასტუმრო - ერთი დღე-ღამე 149 ევროდან.
• 5 ვარსკვლავიანი სასტუმრო - ერთი დღე-ღამე 226 ევროდან.

რომში სასტუმროს, ჰოსტელის ან აპარტამენტის დაჯავშნა ჩვენი სასტუმროების განყოფილებიდან შეგიძლიათ.

სად არ ღირს რომში ცხოვრება?

ტერმინი

ტერმინის სადგურის უბანაში - აქ ძალიან იაფი სასტუმროებია, თუმცა ატმოსფერო, რბილად რომ ვთქვათ, არცთუ ისე სასიამოვნოა. აქ მუდამ ხმაურია და პრაქტიკულად არაფერია იტალიური. ფაქტობრივად საერთოდ არ იგრძნობა, რომ ლამაზ რომში იმყოფებით. უსახლკარო და მთვრალი ადამიანები 5 წამში გაგიფუჭებთ  შთაბეჭდილებას ქალაქის შესახებ.

ტორ ბელა მონაკა

თუ ტერმინის უბანი უბრალოდ არ არის კომფორტული, მაშინ ტორ ბელა მონაკა ნამდვილად სახიფათოა. ეს არის კრიმინალური უბანი, სადაც თქვენს გაძარცვას ადვილად შეძლებენ.

რომი: სასარგებლო რჩევები

• დაზოგეთ თანხა მგზავრობასა და მუზეუმის ბილეთებზე. შეიძინეთ სამდღიანი ტურისტული ბარათი Roma Pass (€38). ამ ბარათით ქალაქის ტრანსპორტით უფასოდ იმგზავრებთ და მრავალ მუზეუმს მოინახულებთ რიგში დგომისა და შესვლის საფასურის გადახდის გარეშე.
• ისარგებლეთ იმით, რაც უფასოა, დაზოგილი თანხა სხვა მიზნებისთვის გამოიყენეთ. რომში უამრავი ადგილია, რომელიშიც შესვლა უფასოა. მაგალითად, რამდენიმე უფასო მუზეუმი: ნაპოლეონის მუზეუმი, წმინდა ლუკას ეროვნული აკადემია, პიეტრო კანონიკის მუზეუმი, რომის რესპუბლიკის მუზეუმი, დი კაზალ დე პიაცის მუზეუმი, კარლო ბილოტის მუზეუმი, ანტიკური ქანდაკებების მუზეუმი და ვილა დი მასენციო.
• ბილეთები წინასწარ ონლაინ შეიძინეთ. რომი ერთ-ერთი ყველაზე ტურისტული ქალაქია მსოფლიოში და აბსოლუტურად ყველა აქ ჩამოსულ ტურისტს სურს მოინახულოს კოლოსეუმი და ვატიკანის მუზეუმები. იმისათვის, რომ რიგში არ იდგეთ, მაგალითად კოლოსეუმში,  ონლაინ შეიძინეთ ერთ-ერთ ექსკურსიაზე. ასევე შეგიძლიათ შეიძინოთ ორდღიანი კომბინირებული ბილეთი, რომელიც საშუალებას მოგცემთ მოინახულოთ კოლოსეუმი, პალატინი და რომის ფორუმი, რაც მნიშვნელოვნად შეამცირებს ბილეთების ხარჯებს.
• სათანადოდ ჩაიცვით. თუ რომში ზაფხულში მიემგზავრებით, გაითვალისწინეთ, რომ ეკლესიებსა და ბაზილიკებში არ არის დაშვებული შორტებით, ფლოსტებით, მოხდილი მხრებით შესვლა. აუცილებლად ჩაიცვით კომფორტული ფეხსაცმელი, რადგან ბევრი სიარული მოგიწევთ.
• მთელ ქალაქში უამრავი სასმელი წყლის შადრევანია. ღმერთმა შეგარგოთ, იგი სრულიად უსაფრთხოა, რაშიც ადგილობრივი მოსახლეობაც დაგემოწმებათ.

სად შეიძლება რომში იაფად მივირთვათ?

თუ თქვენ არ ხართ მზად საკვებზე დიდი თანხა დახარჯოთ, არ წახვიდეთ ტურისტულ რესტორნებში. მთავარი ღირსშესანიშნაობებიდან მოშორებით მდებარე ადგილებში იაფად და გემრიელად წახემსებას შეძლებთ. გამოცდილი მოგზაურები გვირჩევენ რესტორან  Carlo Menta, პიცერიას Da Baffetto, Pinsere, Casetta di Trastevere.

მრავალი კაფისა და რესტორნის ანგარიში coperto-ს მოიცავს (€ 2-3). ეს არის მომსახურების სავალდებულო  საფასური. ცალკე თანხის „ჩაიზე“ დატოვება იტალიაში არ არის მიღებული.

რა მოვინახულოთ რომში?

რომის ღირსშესანიშნაობებისა და ქალაქის მარშრუტების შესახებ წაიკითხეთ სტატია რომაული არდადეგები: 20 MUST SEE ადგილი, რომელიც აუცილებლად უნდა იხილოთ.

რომის ღირსშესანიშნაობები: სამუშაო საათები

რომის ფარგლებში თქვენი მარშრუტის დაგეგმვისას, გაითვალისწინეთ იმ ადგილების სამუშაო გრაფიკი, რომელთა მონახულებას აპირებთ. გთავაზობთ მთავარი ღირსშესანიშნაობების სამუშაო საათებს:

• კოლოსეუმი: ყოველ დღე 8:30 საათიდან, იკეტება მზის ჩასვლამდე ერთი საათით ადრე. 25 დეკემბერსა და 1 იანვარს არ მუშაობს.
• რომის ფორუმი: ყოველდღე 8:30 საათიდან, იკეტება მზის ჩასვლამდე ერთი საათით ადრე. 25 დეკემბერსა და 1 იანვარს არ მუშაობს.
• წმიდა ანგელოზის ციხესიმაგრე: სამშაბათიდან კვირის ჩათვლით: 9:00 საათიდან 19:00 საათამდე.
• პანთეონი: ორშაბათიდან შაბათის ჩათვლით: 8:30 საათიდან 19:30 საათამდე. კვირას: 9:00 საათიდან 18:00 საათამდე.
• ბაზილიკა სან ჯოვანი ინ ლატერანო: ყოველდღე 7:00 საათიდან 18:30 საათამდე.
• ვატიკანის მუზეუმები: ორშაბათიდან შაბათის ჩათვლით 9 საათიდან 18:00 საათამდე (ბოლო შესვლა 16:00 საათზე). თვის ბოლო კვირას 9:00 საათიდან 14:00 საათამდე (ბოლო შესვლა 12:30 საათზე), სხვა კვირა დღეებში დაკეტილია.
• წმინდა პეტრეს ტაძარი: ოქტომბრიდან მარტის ჩათვლით: 7:00 საათიდან 18:30 საათამდე. აპრილიდან სექტემბრის ჩათვლით: 7:00 საათიდან 19:00 საათამდე. გუმბათი იღება 7:30 საათზე.
• სანტა მარია მაჯორეს ბაზილიკა: ყოველდღე 7:00 საათიდან 19:00 საათამდე.
• სანტა მარია დელ პოპოლოს ეკლესია: ორშაბათიდან შაბათის ჩათვლით: 7:00 საათიდან 12:00 საათამდე და 16:00 საათიდან 19:00 საათამდე.

მოგზაურობა რომში: კიდევ რა უნდა ვიცოდეთ?

• რომში საზოგადოებრივი ტრანსპორტით მგზავრობის ღირებულება 1,5 ევროა, ბილეთი 100 წუთის განმავლობაში მოქმედებს. ამ დროის განმავლობაში შეგიძლიათ იმგზავროთ: მეტროთი და ავტობუსით, ელექტრომატარებლით (ქალაქის ფარგლებში) და მეტროთი, მეტროთი, ავტობუსით და ტრამვაით, ავტობუსით და ავტობუსით. თუმცა ორჯერ მატარებელით ან მეტროთი სარგებლობას ვერ შეძლებთ.
• 10 წლამდე ასაკის ბავშვები  საზოგადოებრივი ტრანსპორტით უფასოდ სარგებლობენ, სახელმწიფო მუზეუმებსა და არქეოლოგიურ გათხრების ადგილებშიც შესვლა თავისუფალია.
• ტრანსპორტში შესვლისას აუცილებლად მოახდინეთ ბილეთის კომპოსტირება. თუ ავტომატი არ მუშაობს, კალმით დაწერეთ ბილეთზე ჩასხდომის თარიღი და დრო.
• 12:00-13:00 საათიდან 15:00-16:00 საათამდე რომი სიესტაში ეფლობა, მრავალი ადგილი იკეტება. ტაქსის გამოძახებაც კი არ არის ადვილი.
• რომის მეტრო ღიაა 5:00 საათიდან 00:00 საათამდე, შაბათობით 00:30 საათამდე. მეტრო და ხალხმრავალი ავტობუსები - ჯიბის ქურდების საყვარელი ადგილია. საფულე და ტელეფონი კარგად შეინახეთ.
• რომის შადრევნებში ბანაობისთვის ჯარიმა 500 ევროს აღწევს.
• ბარის დახლთან ყავის ღირებულებაა €0.8-1.5. როგორც კი მაგიდასთან გადაჯდებით ერთი ჭიქის ფასი 3-5 ევრომდე იზრდება.
• ყოველი თვის პირველი კვირა დღე - კოლოსეუმის უფასოდ მონახულების დღეა.

როდის არის უმჯობესი რომში წასვლა?

„ჩემი გამოცდილებიდან შემიძლია ვთქვა, რომ რომში მგზავრობის საუკეთესო დრო აპრილი, მაისი და სექტემბერია. აპრილის ბოლოს კულტურის კვირეული იმართება, რომელიც საშუალებას გაძლევთ აბსოლუტურად უფასოდ ეწვიოთ ყველა მუზეუმს, გარდა ვატიკანის მუზეუმებისა. გარდა ამისა, სეზონთაშორის პერიოდში ტურისტების რაოდენობა გაცილებით ნაკლებია, და სასტუმროები და ავიაბილეთებიც უფრო იაფი ღირს. ამასთან, ამ დროს რომში ძალიან არ ცხელა. ტემპერატურა კომფორტულია ხანგრძლივი სეირნობისთვის“.